Performans grupe „Let 3“ počeo je odmah nakon što je HRT objavio imena izvođača koji će se takmičiti na Dori 2024. Jer, kako tvrdi Damir Martinović Mrle, čija je pjesma ‘Babaroga‘ prošla na takmičenju, riječki rokeri nisu se uopšte prijavili za Doru.
-Nismo se prijavili jer pjesma ne postoji – kaže Mrle za Jutarnji.hr.
Pa kako su onda članovi HRT-ovog žirija, koji su odabrali 24 pjesme koje će se takmičiti na Dori, čuli pomenuru numeru, koju autorski potpisuju Damir Martinović Mrle i Zoran Prodanović Prlja, a koja je, od strane izdavača grupe „Let 3“ uredno prijavljena?
-Nemam pojma! Izgleda da nas je neko hakirao – kazao je Mrle, koji na upit hoće li onda „Let 3“ nastupiti na Dori, kaže:
-Kako da nastupimo s pjesmom koje nema? Ne znam! Čudno mi je sve ovo. Šta da radimo? – pita Mrle.
Što se HRT-a tiče, njima se, interesantno, ekipa iz „Let 3“ još nije javila kako bi ih obavijestila da su za Doru izabrali pjesmu koju autori, kako tvrde, nisu ni prijavili.
-Sve dok od „Let 3“ ili njihovog izdavača ne dobijemo službeno obavještenje kako ih je neko hakirao, odnosno da nisu oni ti koji su nam poslali pjesmu koju je napisao i koju pjeva „Let 3“, neumjesno bi bilo išta komentirati. U svakom slučaju, sljedeća dva mjeseca neće biti dosadno – kažu s HRT-a.
